عســــــــــاني الموت

الحب .. طفل ٍ سكن شعري وهوجاسي

وفي ظلوعي العوج ربيته وكبّرته

خذاني من .. الوطن والناس وانعاسي

وابلا قناعه .. تقبّلته و برّرته

سلمت أمري إليه وطحت متواسي

إلين ماصار شي ٍ ما تصوّرته !!

حبيبي .. كيف اكذّب حزني وياسي

لو العذر يعذرك قبلك تعذّرته !!

الله يسامحك .. ما قدّرت احساسي

وانا على شانك .. الاحساس قدّرته

نسّاني الهم .. غالي ربعي وناسي

وذكرت ربي .. وقلبي فيك ذكّرته

ودوّرت اسهل طريق .. لضيقة انفاسي

ماكن درب الفرح .. لرضاك دوّرته

يا سيّدة خافقي ومحطمّة باسي

كم مرة ٍ لمت خفّاقك وحذّرته

صحيح احبك .. وآخاف فراقك القاسي

وخطاك .. ياما تجاهلته ومرّرته

لكنّي اليوم لا ذاكر ولا ناسي

ودّعتك الله .. وقلبي عنك صبّرته

عساني الموت .. كان بينحني راسي

ويا جعلي الضيم .. لو مبداي غيّرته


محمد الجارالله السهلي